Lamdawt Omlo

“Ka ngaihsun hi… ka ngaihsun kik aa, a kha in hongbei hi..

Tuabek hilo ngaihsutna tawh kum hongbei hi.

99 vei dongciang kangah a phite a maanlo pi hithei lai zen hi..

100 vei taktak teh a maan (a dik) ka ngahzo pan hi…”

Albert Einstein

            Leitungbup ah mipil leh misiam pen khat in a ki ciamteh, ipu Albert Einstein ii kammal te’ lakpan khat a hihi. Leitung ah mi minthang icih te khempeuh a sepna-a bawlna uah a hun uh leh a thahatna uh tampitak a zanghlo kuamah omlo hi. Haksatna buaina tampi tak thuak in, gentheihna leh tuahsiatna tampitak thuak masa lo in omlo uh-hi. A tup a sawm uh a ngah theih na dingun cihtakna tawh nungta in lungduai tak in a hanciam te a hi uh-hi. Meter 100 pen Second 10 sungin a taaizo, taihat in a minthang mite in, ki mawlna hun sungah Second 10 sungbek a tai ziau nading lel a hun uh bangzah piakhia in, a thahatna uh bangzah tawh ki sinkhol uh a hi hiam? Cih na ngaihsun kha ngei hiam? Hanciamna leh hun piakkhiatna omlo pi-in ‘MI’ kisuak zolo hi.

            La (poet) gelhsiam in a minthan ban-ah, a gelhsa laibu te Leitungbup ah pau’ nam (20) valtawh a kilet khiat sak Sir. Robert Frost; Laibu bawl dingin a kipat cil-lai, kum (20) sung bangh a buaipih khit-teh bawlkhia zo nailo hi. Tuahun lai-in, lungkia-in tawlnga zenleh, a min theikha hetlo ding hihang. Lungkia hetlo in cihtakna tawh damdam in a sep teitei leh leitungbup ah minthan lawh-hi. A merica kumpi teng lak ah mi khempeuh in ih theih Abraham Lincoln, mizawng daipam khat pan a khangkhia mikhat hi aa, kumpi a suahtheih na dingin zongh  (7) vei bang nungkik-lo-in a hanciam a hihi. Lai Siangtho sung mahmah ah zongh, Moses in Israel mite Canaan gamnuam a tunpih nading, kum (40) sung tawntung-gamsungah a hun beilawh-hi. Paul (Solo) a ki khelkhit kum (14) dongciang kuamah in umlo in thupimuh ngiatlo uh-hi. Pasian’ tapa-ahi Zeisu nangawn in apa’ deihna- asep khiat zawh na ding kum (30) bangh ahun beisak hi. Zeisu leh a nungzui te an-neek-khop tawpna (the last supper) lim, Davanci-in kum (4) sung vilvel asoih ciatciat a hihi. Lamdawt cihbangh omlo hi.

            Khat veivei hanciam tak-in ih kalsuan laitak mah, a gualzo sa leh a lawhcing sa te peuh ih muhciang ki eng in, amau bangh ih hih ding ki ngaklah luakha thei hi. Khanglui te in: “…An min ngaklah gilna…” cih leh “…Lamdawt tawn, kumkua in tunglo…” cih paunaak aneih uh hoih kasa mahmah hi. Hauh ding ki ngaklah in, lamdawt-tawn hauhtheihna ih zui ziauziau aa, tua ihngah hauhna na ngawn nuamtak zangh ngamlo in launa lungsim tawh ih nuntaakna bei diaidiai hi. Ih tuu ihtaa’ khang dongciang mangthei ding cih thadah, ei’ nuntaak sunglian nangawn ihkhom zokei hi. Nikhat, ninih peuh ankhing khamtheih ziauna bek ki muthei ta lawmlawm sam ahih manin, ihneih a manpha mahmah ahi, Paalpi paak aa kipan, gamsung van manpha tampi te ki zongin, a zung a maam in ki botkhia gawpmai aa, kum (100) bangh apha ding singkung lianpipi cikzia hetlo in ki phuk ziahziah den lawmlawm a hih manin, etlawm mualkuam, zogamnuam ih cihcih, ih zogam leitangh, etlawm zo nawn hetlo in tul ngiungeu ta-aa, khuangaih-huai mahmah ta hi. Khuahun nangawn in thuakzo nawnlo in, a sat hunteh salua, a vot hunteh votlua zelta hi. Khuahun kisiagawp ahih manin dawnding tui siangtho leh neek ding anteh theipuam a kicing in ki ngahzo nawnlo hi. Tuabang haksatna ih thuak zihzeh ciang, ih lungham in ih hehsuak ahih manin ih hanghang nuam lai sawnsawn hi. Eima bawl’ a hih lam phawk khalo in, Pasian peuh ih mawh saksak nuam lai thei hi. Banghang hiam cihleh, ih gilna mahmah ta mawk hiven.

Nuntaakna ding hanciamna leh sumzon paizon-na-ah ih zulhzau mah bangh lian in pilsin te leh siamsin sang naupang te in zongh lamdawt ki zuinuam mahmah lai mawk hi. Nidangin ei mite apil masa leh a theimasa kihi napi, tu hunteh lamdawt ih zuihzuih khak na hangin mite’ nungzui-in, ki om khinta-aa, gilna in ih gimsim ta hi. Pawlkhat-te a dinmun uah gilna in a luplup laitak, pawlkhat te leuleu lamdawt a zuihna hangun gimlua uh a hih manin, mainawt zo nawnlo uh-hi. Pawlkhat te leuleu an-min ding ngaklah in a ki leklek na lamteng in a-an bel bunglip kha sawnsawn uh ahih manin, lungkia in tawlnga mai uh-hi. Tawlnga in, tawlnga paisuak uh a hih manin, a mau a dingin zongh kumkua cingthei ngeilo hi. Lamdawt zuihnopna leh an-min ngaklahna te hangin, gilna in a lumlum tawh, hihna mel ki theilo in a mai mangmang tawh ki thehthang gaita hi. Hibangh thute hangin zomi te thangkiak lak ah ki gammang khinta hi. Gualzawh na ding hong khaktan thei zulhzauna lungsim a hi, lamdawt zuihna leh matut na ding hong khaktan thei cihtak lohna lungsim a hi, an-min ngaklah na lungsim te paisan ding kisam mahmah ta hi.

Leitungah mihau in a minthang Bill Gates hauhna zia, pil mahmah a hih manin a pilna tawh leitungbup a ki khelsak zo Marie Curie’ thumuh zia, Pasian’ a dingin a nuntaakna khempeuh a piakkhiatna hangin a lawhcing mahmah John Wesley’ vangliat zia, cih-bangh in mipil, misiam, mihau leh mi khangto khinsa te ih ngaihsut ciang, a mau bangh ki ut in ki eng mahmah na pi, a thuakna uh leh citak-tak in a hanciamna te uh ngaihsun kik leuleu lehang ki deihgawh zo nawnlo thei mawk hi. A maute in a hih leh cihtakna leh kuhkalna nuntaakpih khin uh a hih manin, hanciam ding khempeuh leh thuak ding khempeuh lunghiang hetlo in phuto ciatciat zo lel uh-hi. Tupna kician nei-in Pasian ki makaih sak uh a hih manin a hunhun in gualzawhna in gak-khol khinta hi. Bangbang buaina-a tuak hangun, lungkia lo in, zong ngaklah lua kha selo uh-hi. A tuah uh thuhaksa te a hih leh mikhempeuh in a tuak zelzel a hih lam thei uh a hih manin lamdang zongh sa selo uh-hi. A maute in a tupna uh telcian sinsen uh a hih manin, lungkiat dingin ngiahsun hetlo uh-hi.

Leitung ngalpi (2) na hunlai-in thukansiam in a minthang mahmah, William Shirer, na theikha khin ngeel ding hi. William in galpi aven’ khitteh laigelhsiam khat suahzawh ding tupna khat nei khinkhian hi. Kum (12) sung tawntung hanciam in lai tuamtuam gelh napi, a lung-gulh bangin a ma tun zolo mawk hi. A bawlkhiat theihsun te kideih ngiatlo a hih manin a innkuan sung nuntaakna uh zawnlawh diipdeep hi. Tuabang hunsung lian mah in laimai (1200) bang apha ding, Laibu sah mahmah khat hong hanciam leuleu mawk hi. Tua Laibu a mu khempeuh in, hizah aa-asah Laibu ki zuakthei vetlo ding hi… ciciat uh-hi. A Laibu manzah dingleh na hanciamna kituak theilo ding hi. Na nasep haihuai, gimhuai lel hi, tawlnga hithiat zaw-in, ci-in mi khempeuh in buaipih mahmah uh-hi. A innkuan pih te mahmah in zongh “Laibu hong bawl nawn kei tapeuh in, puuksih lawh ding hihang…” ciliang uh-hi.

William lungkia tuanlo in, Hitteler hunsung aa German gam omzia, athu ala, cingtak in a kaihkhop ‘The Rise And Fall of The Third Reich’ cih thulu tawh a Laibu bawl hawmkhiat theih ding ciang tunta hi. Tua-a Laibu pen a tawm thei penpen $ 10 nuai-in ki zuakthei vetlo ding hilian hi. Tua hun in Laibu tuazah man omngei nailo hi. Mi khempeuh in a ki khawngzo dingin lamen hetloh uh-hi. Kua ma-up hetloh leh lamet hetloh laitak mah in William in a laibu a zuak khiat teitei leh, a hawmkhiat cil ni lian mahin, abawl khempeuh khawngkhin pah-hi. A hunhun in kei deih toto aa, tuni dongciang a ki deih penpen Laibu te’ lak-ah khat in ki ciamteh-hi.

A kiim a paam’ buaipihna leh a innkuanpih te’ muanzawh loh na hangin William lungkia lo hi. Lai at minthang khat a suahzawh na ding lungduai tak in kum sawmnih vaal bangh buaipih-hi. Kum (12) sung tawntung lai gelh tawh buai mahmah khin napi, kua mahin a lai gelhte deihlo mawk hi. Lungkia lo hi. Zongh ngaklah lo hi. Lungduai tak leh citak tak in a lung-gulhna-a hanciam teitei leh leitung ah minthangin, a min mangthang ngei nawnlo hi.

Na khempeuh a hoihna tawh kituak in thaman piak a kul vive a hihi. Na hoih leh na lianpi deihna pi, cihtak ding leh kulhkal ding ih tup masak kei leh ih hanciam na thaman omlo ding hi. A ol-ding leh a manlang ding bekbek ngaihsutna in siatna leh supna hongtun’ thei zaw tawntung hi. Pasian mitsuan in cihtakna leh kulhkalna ih nuntaakpih khitciang bek in ih zogam hong paal-lun kik zo pan ding hi. Tuahun ciang a hihleh, ‘etlawm mualkuam, zogam nuam’ ih cihcih hong taksuah ta ding hi. An min ngaklah bangh aa ngaklah themthumna pan hongpiang, lamdawt-tawn hauhna leh pilna te paisan ta ding hihang. Ih hauh leh tua hauhna pen a kip a kho ding hauhtaak hauhna taktak hi henla, pilna in a makaih hauhna zongh hita hen. Tuamah bangin ineih pilna te pilna taktak hi ta henla, Pasian zahtaakna bulphuh in a piangkhia pilna taktak hita hen. Theologian khat leh mipil muantaak khat aa ingak a hi, Dr. Do Sian Thang in: “…Hauhna pen pilna in makaih henla, pilna a hih leh Pasian zahtaakna-ah kiphut-ta hen…” na ci hi. Ka lungsim honglawng mahmah hi.

 Tuabang pilna leh hauhna namte ihneih hun tak ciangin, tua ih hauhna leh ih pilna te’ hangin ih lung-gim nawnlo ding aa-a khang a khang in zongh kip suksuk zo ding hi. Tua pilna leh hauhna te’ hangin zogam leh zomi-in cidamna leh tawldamna ngah lawh ding aa, leitungbup tawh liangko kikim zo ta ding hi. Tua hunciang a hih leh ‘Pasian’ zat minam a hih keh, thupha ngah minam’ ih ki cihcih te, a bat laklak ih-hi nawnkei ding aa, Pasian’ hong zat-taktak leh hong thupha piak taktak te ih-hi ta ding hi. Tua bang dinmun tun zawhna pen gualzawhna taktak a hihi. Mi gualzo, Pasian’ zat leh thupha ngahmi khat suahzawh na dingin zuihtheih ziau ding ‘LAMDAWT’ cihbang ‘OMLO’ hi.