"Gupngah kitelcianna na neikhin hia?"
Tui sungah a tum theilo ding zah dongin a ki ngaihsun, a muanhuai na leh ahoihna hangin a minthang vangvang Titanic tembawpi, tuikhalpi tawh kisukha in Atlantic tuipi sungah a tumsuk diaidiai hun, April 15, 1912 kum zingsang nai 2:40 kiimpawl in sihna leh nuntakna kikaal ah a om mi 2000 valte lak ah mi khat va kileh kawikawi-in a phakzawh zahzah kiangah Gupkhiatna thu a genpihna kammal ahi hi.
Tua mipa ahih leh kua mah in phawkin kinei khalo hi. Tua hun laitakin mi a tamzawte in a thugen ngaih dingin zong a tuatkhak manlo uh hi aa, tua mah bangin tuni dong ciang mah amah kinawl khin gige lai hi. Hollywood te in zongh hi mipa phawk dingin ngaihsunlo uh hi. Titanic thu tawh kisai Movie tampi a om khit hangin, tua mipa bulphuh in a kibawl Movie om nailo hi. Titanic tembawpi a kisiatna thu a kanciankik mipilte in zong tua mipa phawkin neikha lo uh hi. Ahi zongin, nasep hoih a sem tua mipa ahih leh a theikha sunsunte' lungtang sungpan ki lakhia kik thei nawnlo hi.
Tua mipa pen, Pasian nasem John Harper hi-in,
ta numei khat a neih khit ciangin a zi-in a sihsan mikhat hi sawnsawn hi. A pian thak khit kum 17 a phak a kipan a tuahtuah na ah Pasian thu genin, lam kiim lam paam ah a kileh kawikawi mikhat hi aa, tua bangin kum 6 sungbang a kileh kawikawi khitciang Baptist Pioneer Mission, London ah Rev. E. A. Carter in samin, tua mun pan Pasianna' a tangzai zaw in septheihna hun angah ahi hi. Hunkhat ciang, pawlpi khat phuan in tua lai ah Pastor semin om hi.
Titanic tembawpi tungah kum 6 apha, Nana a kici a tanu (Annie Jessie Harper) leh a sanggamnu tawh Chicago lam zuanin Moody Church akici D.L. Moody' pawlpi ah Pasian thu tangko dingin apai uh ahi hi.
A tuanna uh Titanic tembawpi tuisungah tum ding kithawita ahih manin, kihuutna tuipuante kihawm ziahziah in, donghu gunkuang tungah mi a honhon in kinawn ziahziah hi. Harper in, a tanu leh a sanggamnu manlaang takin donghu gunkuang tungah kha hi. Tua laitakin amah zong, gunkuang tungah tuang pah nuam hileh a hithei ding ahi hi. Ahi zong, a tanu kiangah:
"Laukei o maw, Nana.. Khatvei ciang kimukik ding ihi maw..."
A cih khit ciangin, donghu gunkuang a ngah zolo mihonpite omna lam ah kileh in, gupkhiatna thu tangko kipan zen hi.
Kihuutna tuipuan tawh tuipi tungah kivaan deekdeekin cihna ding a omnawnlo sih ding maingat mi tampite kiangah tuaksuk in, i thupatna kammal ahi:
"gupngah kitelcianna na neikhin hia?"
ci-in khat khitkhat dongh kawikawi hi.
"Gupngah na kitelcian naikei a leh tu mahmah
in Zeisu gumpa leh honpa in sang theilai hiteh. Zeisu gumpa leh honpa in sang lecin nuntak tawntung na ngah theilai hiteh" ci-in awng kawikawi hi.
Hi bangin a-awt kawikawi laitak mikhat in:
"kei, gupngah kitelcianna nei nai ke'ng!" ci-in dawng kik hi. Harper in manlang takin naih in:
"Lawm aw Zeisu in nang hong it hi. Na mawhna khempeuh hong maisak khin hi. Nuntaakna hong pia nuam hi. Tu mahmah in na lungsim kongkhak na hon in." A cih khitciang, a gal khat aa-a om, khuavot lua hangin a kitan leepleep mikhat vanaih phei-in, a silhlai a tuipuan suah khia in;
"kei sangin nang kisam zaw teh silh in," ci-in a silhsak khit a sawtlo in Harper tuisung ah tumsuk diaidiai hi.
Tui sungah tawmveipi a tumsuk khit ciang, khatvei hong laamto kik in, a nunung penpen lungdamna thu a genna, Christmas thu tomno khat tangko khia man lai hi.
Tua sungah,
"Zesu Khris eite' sih tangin a si dingin hong suak ahi hi. Ahi zongin tua hong suahna in hih tuipi sungah i tumsukna ding panin hong gumkhia lo kha ding hi. Hong gum khia kei mah ta leh, hih tuipi sungah tumsuk aa sihna sangin a lauhuai zaw tawntung sihna panin hong gum khia khinzo hi." ci kawmkawm in, tuipi sungah tumsuk diaidiai in, a nuntakna beita hi. Tua hun laitakin a piankum 39 pha pan aa, tuahsiatna hangin misi 1500 val sungah a kihel ahi hi.
Kum 4 khit ciangin, Titanic tuahsiatna sungpan a suakta kha sunte kimuh khopna masa kibawl hi. Tua mun ah, liamna baaina khit ah a suakta tangval khat in "kei pen Harper kikhelsak mite' sungpan a nunung pen kahi ding hi," ci-in, a tunga ih gen Harper' gupkhiatna thu tangkonate leh tua hangin gupna-a ngahna thu khitui luang kekeuh kawmsa in teci pang kik hi. Hi tangvalpa mah bangin Titanic tuahsiatna sungpan a suakta kha mi dangte in zongh, John Harper in Sawltak 16:31 sung a husan tawp tawh kiko in awngawng hi, ci-in gen uh hi. Hi mipa tawh a kisu kha sunsunte in mangngilh thei nawnlo uh hi. Tua mah bangin tu dongin, Moody Church, Chicago ah a om John Harper Phawkna Innpi-in zongh ki mangngilh theilo Salpha khat ahihna hong phawksak hi.
Lungdambawl i cihcih Zeisu Khirs hong suak ni phawk-kikna ibawl zel hun hong tung kik ding hita hi. Harper' cih bang ngeei-in Zesu Khris hong suahna hangin nisim ih nuntakna sungah ih tuah khak haksat buainate pan hotkhiatna kingah pah lo kha dinga, ahi zongin, tuate tawh teh theih ahilo tawntung sihna panin hotkhiatna ngah in NUNTAK TAWNTUNGNA angah khin ihi hi (John 3:16).
Merry Christmas to you all!
π✨πππ π❄️π ✨π✨π☃️
Etkak laibu:
Adams, M. (2012). The Titanic's Last Hero: A Startling True Story That Can Change Your Life Forever. Emerald House Group, Inc.
