American Idol leh Zomi Idol: Idol laimal buaina

🔶 Bang hangin hih buaina piang❓

🅰️ A Mangpau/a Manglai mah i idol luat khakna hanga piang.​ (Gentehna: Zogam sunga, Zomi bek omna mun a kibawl pawi khat peuh leh nasepna khat peuh nangawn ah thu bulphuh Manglai mah tawh gelh puut.​ Zogam sungbek ah a kizuak ding T-shirt kibawl, a tungah Manglai malkhat mah guang nuam. Manglai idol mahmah hang.​)

🔶 Idol a khiatna ee❓

🅰️ Khiatna namlii bang nei hi.
1. Thupisak thu, leh pahtak deuh thu genna
2. Mi minthangte genna
3. Milim biakna
4. Vangliatna genna
(A piankhiatna: Greek kammal 'lim' cihnopna 'eidos'.
(Wiktionary)

🔶Ahih leh kidemna, la kidemna cih khiatna neilo pi bang hangin la kidemna mun ah hih kammal kizangh❓

🅰️ La tawh kisai ah hih kammal a kizat masak na pen Pop Idol a hihi. Pop icih ciangin RC Pop agen nuam hilo aa, Pop music style a gen nuam ahi hi. Hih Pop music tawh kibawl la, a sa siamte, min thangin, pahtawitak ahih manin, Pop Idol ci in pahtawina piak ding Simon Fuller in apat khiat ahi hi. Tua panin a zai zaw ahi American idol in a kilaih to ahi hi.

🔶 Ahih leh hih laimal hong kipatna hoihlo cileeng ee❓

🅰️ Hong kipatkhiatna laimal hoihlo kha thei mah dinga, tanglai in a kizatzia zong hoihlo thei mah hi. Ahi zongin, ahun zui in laimal khiatna a kikhel tampi om toto thei mawk hi. Enpak leeng;

Fantastic: tanglai in 'zuau thu nam, ngaihsut mawk, sun mang, ataktak ahilo' thu genna in kizangh, tuhun ciang 'nasialua' cih lamin kizangh.

Gay: tanglai in"kiteenna le lungdamna' thu ah kizangh, tuhun ciang 'homosexual' tawh kisai ah kizangh.

Egregious: tanglai in 'a hoih' genna ah kizangh, tuhun ciang 'a sia' genna ah kizangh.

Hi danin ahun zui in, laimal khiatna/zatzia a kilumlet tampi om mawk hi. Gentehna,: Awful, Nice, Cheater, Terrible tampi omlai ding.

Tua hi in, idol zongh a gui a zam kancian leeng a kipatkhiatna hoihlo kha mah inteh. Ahih hang tua a kipat khiatna a gui a zam bek siksan kinkun theih a hihlohna kimu thei hi.

🔶 Hih kammal Zomi Idol ci in a kizat ciang ee❓

🅰️ Sia Do Khup post na ah: "Ko hih kazat uh ciang, Zomi Lasiam nu/pa ka cihnopna uh hi" ci. Tua mah bangin America Idol a cih ciangin American Milimbia pawl cihna hilo zaw in, lasiam tungtuang kidemna acihna ahih lam America idol tangthu sim leeng kimu thei.​

Dr. Do Suan Mungin, Idol tawh kisai part 2 a gelhna sungah, Idol pen milim biakna cihnopna hi aa, ei Pasian thuzuite in zat huailo cih thuleh, laimal (pau) a hunzui aa, a kizat zia kibangh lo, ahun leh a zat zia ettel huai ahihna thu Greek tanglai mipilte hunlai tawh genteh.​

Hi dung zui in, la siamna tawh kisai ah idol a kizat masakna Pop Idol hun lai in zongh amau milim lam na genlo in, siam penna lam genna in na zangh zaw uh aa, thamlo in, Sia Dal Sian Amm in, tuhun khangthakte in idol a kizat zia Zingsol forum ah suah in, tuhun khangthak ah a kizangh idol pen biakna tawh kisailo ci in gen. (tanglai greek) hunlai a zatzia in himun ah kizangh lo hi.

🔶 Zomi idol in milim biakna vailam mah huam ahia❓

🅰️ Milim biakna tawh kisai in Dr. Do Suan Mung gelh Idol tawh kisai sung mah ah, sum deih luatna zong milim biakna nam khat ahihna thu gen.​ Cihnopna ah na lungsim sungah a tawntung aa na lunggulh, na mitkha ah aluai den, na hanciam niloh thu khat pen nanga dingin na idol ahi hi. Ahih leh idol tawh mikim kinah vawh ciat cihna himawk hi. Lungsim sungah huatna idol, hauhnopna idol, eenna idol, zawh nopna idol etc. a neilo omlo ding hi.

Ahi ta zongin, tua na idol tuamtuamte na bia hi kici leeng, kuamah lungkimlo ding hi. Bang hang hiam cih leh, ahih nop, a deih, a lunggulh bek hi aa, abiak hilo ahih man ahi hi (I thupisak/lunggulh peuh a kibia hilo in, i biak pen bel lunggulh/thupi sak ding kisam cih hizaw hi). Tua ahih manin, American Idol, Myanmar Idol, Zomi Idol zongh, biakna tawh kisailo zaw in, siamna lam ah enhuai/etteh tak cih lam tawh a kisai ahi hi.

🔶 Midangte in buaihuai asa uh hia?❓

🅰️ American idol cih apianma, Pop idol pan kipan aphuankhia pa Simon Fuller thu tawh kisai interviews na pawlkhat kasim/ ka ngai kha hi. Tua sungah Forbes, Business standard, a kipan Christian thupuak tuamtuam ahi, CBN news leh Christian Today te sungah, hih 'Idol' cih kammal bang hangin zangh nahia cih dotna ka mu/ka ngaikha naikei hi. Amau buaihuai in ngaihsunlo uh hiding hi, kaci hi.

🔶 Tua leh hih Idol ei a in a buaipih huai mah hiam?

🅰️ A buaipih nuamte leh buaipih taak a sate a dingin buaipih huai ding hi. A hi zongin, hih buaipihna-ah Zomite a masa kihi pah ding hi.

🔶 American idol ah ee leh Christian te a kihel hiam❓

🅰️ Tu laitak mahmah in Christian hiteng bang American idol ah finalists lut uh hi.
1. Colton Dixon
2. Heejun Han
3. Joshua Ledet
4. Didi Benami
5. Tim Urban

A beisa hunin American idol pan a minthang Christiante tampi a om sungpan:
1. Carrie Underwood
2. Mandisa
3. Danny Gokey
4. Chris Daughtry
5. Colton Dixon
6. Kelly Clarkson
7. Carrie Underwood

🔶 Tua ahih leh bangcih ding, mailam ah idol zat zia❓

🅰️ Nangma thuthu...

Thukhupna:

Idol kammal na lipkhap leh na lipkhap bangin a um nahi aa, a hoih lamin na up leh na up bang mah ahi hi. A hang pen a sia apha nang ma san zia tungah kinga mahmah in, hih maan zaw hih maanlo zaw cih bang kawk gawp theih hilo hi. Bang hang hiam cih leh: Democrat a om mah bangin, Republican om aa, Liberalism a om mah bangin Fundamentalism zong na na om in, hite sanzia leh dinmun kibang den theilo uh hi.

Note: Dr. Do Suan Mung lai gelh langpan nopna hilo hi. Siapa pen kei a dingin ka idol khat ahih manin, amah ka bat ding a han ciamciam kahi hi. Thamlo in, Zomi idol tawh kisai a thukhupna ah sia Tuang Za Khai in ka idol hi hong cikei leh ci in gelh hi. Ahi zongin, ken hih idol cih kammal lipkhap ngaihsut hetlo leh, tanglai aa zatzia leh tuhun la kidemna mun ah idol cih a kizat zia tawh kizui in, tuhun idol zatna in Pasian tanga biakna namin sang khalo kahih manin ka 'idol' mah cih sawm ing. Sia pa in zongh hong telsiam dingin um ing.

Read More