Thumasa
Khat veivei lawhcinna leh tungtuanna tawh kisai kitheikhial kha thei hi. A pildiak, a siamdiak leh a citheidiakte a tungtuang zo phadeuh in ki ngaihsun thei tawntung hi. American Scientist Harold Delos Babcock in “ei’ neihloh hihdiakna khat peuh aneite tungtuang diak uh hi, ci-in ngaihsut khakna pen alian mahmah supna lah hi-in mawhna lah ahi hi.” Ci ngei hi.
Napoleon Hill in kum 25 sung vingveng, lawhcinna tawh kisai abuaipih dipdep khitciang, a tungtuang diak mite lakah 5% bekbek pildiakna leh siamdiaknate hangin a tuaci thei uh ahih lam na theikhia in, John C. Maxwell in zongh kum 30 sung vingveng a kattel khitciang, 15% bekbek siamdiakna, pildiakna leh cihtheihdiaknate hangin a tuaci uh ahih lam na mukhia hi. Thomas A. Edison in zongh, tungtuan na dingin hihdiakna 1% bekbek kisam hi ciliang hi.
Tua ahih leh tua hihdiakna (talents, ability etc..) te’ sangin a thupizaw om lai gige cih kilangh hi. Tua-a thupi zawpen bang hi peuhmah ding ahiam? Thu thum ih longkhia ding hi.
1. Kiniamkhiatna: Sinnopna Lungsim
Kiniamkhiatna pen kineuseekna tawh kitelkhial kha thei leuleu hi. Sumbawl minthang leh laigelhsiam minthang Ken Blanchard in “Kiniamkhiatna pen ih neih hihna zah sa’ngin a niamzaw aa kingaihsutna hilo in, ih hihna mahmah tawh kiniamsakna hi.” Naci hi.
Khatvei Billy Graham kiangah mikhat in, “Billy Graham a cih pa nahi na?” Ci-in va dongh hi. Graham in “He himah ingh” a vacih leh tua mipa in, “aw… mi minthang mahmah pa lah nahi aa?” Graham in, “kei minthang hiaulo, ka tangko gupna thu a minthang hizaw..” Bangzah in hih mi tungtuang diak pa kiniamkhiat ahiam!
Crusades 20 Years with Billy Graham cih laibu a gelhpa John Pollock in, “A thugen ngai-in a om mi tulsawm sa’ng a tawmzawlo mite’ mai pan, Graham in, ‘ka kilawmna bangmah omlo hi, na khempeuh KHA tha hang bek hi.’ Ci-in, khitui luangzeenin a kiniamkhiat den mahmah thupi kasa hi.” Ci-in gelhzen hi. Leitung ah mi tungtuang diak khempeuh phial a tuaci kiniamkhiat ciat uh himai hi.
South Africa ah mivomte sungpan a masa pen President asem Nelson Mandela in sumbawl minthang mahmah Peter, zingan neekpihna khat nei ngei hi. An sim dingin Peter apai ciang, a company aa nasem Dumi mawtaw hawlsak in vapai uh hi.
Mandela’ inn a tun uh ciang, mawtaw khawlna ah Mandela in na nangak khin pahphot hi. A ngeina bangin mawtaw hawlpa aihleh mawtaw sungah omsuak in, apu Peter leh Mandela te innsung ah anne dingin tum uh hi. Ankuang um dingin a kithawi uh ciang, Mandela in, “Peter denin minih hi uteh kaci aa?” A vacih leh, Peter in, “keikia mah hi-ingh, hua khatpa bel mawtaw hawl hilel ee” Cikik hi. Mandela thakhat thu in ding khia vat in, Dumi’ omna ah pai pah vingveng hi.
Dumi kiangah amah mah a kigen tawm khitciang, an nekhawm dingin, inn sungah lutpih hi. Hi bangin kumpi khat nangawn a kiniamkhiatna a muh ciang Peter in lamdangsa mahmah ahih manin, “kumpipa nangawn hizahin hong kiniamkhiat ciang, kei zongh ka kiniamkhiat loh phamawh hi…” ci-in gen kik hi. Hi mi tungtuang diakpa zongh kiniamkhiat mahmah sam!
Kiniamkhiatna in kiliatsakna tungah thunei mahmah ahihlam Peter leh Mandela tung pan ki-thei hi. A kilainsak sim khinkhian, Peter, a kiniamkhiat mahmah khat tawh a kituah ciang, kiniamkhiat loh phamawh in hong piang lian mawk hi. Na kiniamkhiat mahmah naakleh a kiliansak mahmah khat na khutsungah hong ki ap pelmawh ding hi.
Leitung tangthute en lehang kiniamkhiatna hangin mite lawhcing tetek napi kiliatsakna hangin a puklawh leh a suplawh mi simzawh ding hilo zah dongin tammawk hi. Pawlkhatte a pilna uh leh a siamna uh tawh kituak mah in kiliansak khop pah lel uh aa, pawlkhatte leuleu a neihna leh a liatna hangun ultung pah gipgiap uh hi. Hibang mite lawhcing paisuak zolo thamlo in, mite’ totcil in omkik thei tawntung hi. Bang hang hiam cihleh kiniamkhiatna lo tawh tungtuanna taktak a om theihloh hang ahi hi.
Kiniamkhiatna pen tungtuanna dingin kongkhak cingpa tawh kibangh hi. Ih siamna, ih neihsa, ih pilnate lungngai-in, ih kisaplai thute ih mangngilh khak ciang, tua kong cingpa-ahi kiniamkhiatna pen kiliatsakna kongkhakpi-in khaknelh cip thei hi. Kong kikhakcipta ahih manin, muhna leh deihna omthei nawnlo in, dinkhawl khata hi. Tua a ki dinkhawl hun sungin a kiniamkhiat mite, na manawt den uh ahih manin, a dinkhawl mite tuancil cip ta hi.
Kiniamkhiatna in deihna leh sinnopna lungsim kihongsak aa, kiletsakna in sinbeh ding leh zonbeh ding a kisam khempeuh khaktan cip zo hi. Tua ahih manin, tungtuan zawkna ding leh lawhcin zawkna dingin, sinbeh/zonbeh/kanbeh nopna lungsim hong piangsak pelmawh ahi ‘KINIAMKHIATNA’ nuntakpih loh phamawh hi. Tua kiniamkhiatna nuntakpihna tung tawnin a lian mahmah ahi theihna namcin leh zawhna namcinte ngah zawhna ahi hi.
2. Hilhding Deihna: Sinna Kalmasa
November 1860 kumin, D. L. Moody neih Sunday School ah Abraham Lincoln va hawh hi. A ithuai mahmah naupangte maingat kawmsa in Lincoln in;
“Hilai aa, note sungah a zawng penpen khat bangin kei zongh mizawng mahmah khat kahi hi.” ci-in, mitui nam pilhpelh zeenin a gen khiankhian kawmin naupangte’ maitang khat khitkhat baan et kawikawi-in, “…ahi zongin tu in ahihleh America kumpi ka hita hi. Note’n zongh hilai aa’ hong kihilh thute deih in, na zuih naak vualeh kumpi suak zolo ding kici theilo hi…” Ci-in tha apiakna thu John Perry in 10 Christians Everyone Should Know Cih laibu sungah nagelh hi.
Thapiakna mawkmawk hilo in, amah tawh kigenteh ngiatin ahi takpi thutawh tha akipia uh ahi hi. Thu kihilhna deihin zuihna lo tawh ki tungtuang theilo ahih lam, Abraham Lincoln in na theician mahmah khin hi. Tungtuang in lawhcinna dingin thuhilhna deihloh phamawh hi. Tua thuhilhna deihna pen tungtuanna dingin, sinna kalmasa hipah hi.
Think and Growth Rich cih laibu gelhin leitung bup a lokkham zo Napoleon Hill in, “bukno inndei khat sungah piangin, kum 10 ka phakciang ka nu in hong sihsan aa, hong nusiat khit kumnih takciang nukik tawh ka kisin hi. Kum 13 ka phak ciang, seploh phamawh ahih manin laihawm nasep peuh semin sum ka zong aa, kum 30 sung vingveng mah haksatna, buaina, guallehna, zawnna, zumna cih thuhaksa bekbek in hong dawntuah den hi. Ahi zongin, tua thuhaksate khempeuh ka lawhcinna dingin ‘thuhilhna’ na hizaw gige..” Ci-in Andrew Carnegie kiangah a genna thu F.W. Woolworth in Napoleon pahtawina lai apiakna sungah na guang hi.
Thu hilhna pen namtampi tak om ding hi. Kam tawh thuhilhna, thutawh thuhilhna, tuahkhakna tawh thuhilhna cih bangin tampi om kha ding hi. Thuhilh ding a deihlo mipen, a theihna leh a siamna ki behlap thuah ngeilo ding aa, haksak buaina khatpeuh a tuah ciangin zongh thuakzolo in a nungtolh dente mah hipah lel ding hi.
Orison Swett Marden in, The Secret of Achievement (To Success in Life) cih laibu a gelhna sungah, Daniel Webster’ thu themcik na guangin, “Daniel pen a neu a kipan lai a zo phalo khat ahi hi. A lawmte in neumuh in nulhnau den uh ahih manin a omna peuh ah maizumin khitui tawh a kidim denkhat ahi hi. Lungkia in sangtawp ding cih a khensat laitak, a veng nupi khat in thapia in, sang a vakah kik nading leh tu a-athuak thuhaksate ama a dingin thuhilhna khat ahihlam ana genpih pihpih aleh, sang hong kah kik in, a sawtlo khat in, tua mihai Daniel pen a pilpen khat in hong kiciamteh lel mawk hi.” Ci-in na gelh hi. Thuhilhna a deih ciang, lawhcinna/tungtuanna in na nungzuih pah lian hi.
KFC neipa Colonel Sanders, kum 65 aphak na ngawnciang lawhcing nailo in ahanciam ciam lai ahi hi. Amah mah in mawtaw hawl pah ngeungeu in, khua khat khit khua khat ah a sakansa pua kawikawi-in, ansaite ah ciamsak kawikawi hi. Giah nading nangawn ngahzolo zel ahih manin, a mawtaw sungah lummai lel aa, a sakan puak bekmah suantak in nei-in tua bektawh kinaamtak lel hi.
Ansaite a ciapsak kawikawi hangin, kua mah in, thudon peuhmah lo uh hi. Mi 1,009 bang ciamsak khin napi, kamsiam khat zongh a kipiak kikloh ciang lungkiat huai sa mahmah sam hi. Mi a 1,010th petpet ciang, “aw… na khutma sia kei ei lawm…” cihkikna aw khat za kiau hi. Tua kiau ziau bekbek pen Sanders in thangah mahmah in “ka khutma in leitung zelzo inciai…” acih deep leh tu’n a tangtung khin lah hong hiziau ta. Sanders bek hikei, mi tungtuang diak khempeuh phial a tuaci ciat uh ahi hi. Nang bang tawh hong kithuhilh ahi hiam?
Thuhilhna ahi haksatna, buaina, gentheihna, supna-a kipan a tuamtuam phutkhak khat limlim mikim in kinei kimciat hi. Ahi zongin, tua thuhilhnate’ tungah bangcih nuntak cih pen eimau teeltheih thu hileuleu hi. Pawlkhatte in tua thuhilhnate deih in thupi sim uh aa, siamna leh theihna a ngahlawh laitak un, pawlkhatte in deihlo in muhdah bawl leh lau ngaihsut uh ahih manin, phu nuamlo in, nung khinsan uh hi. A phawkhuai mahmah thu khat in, tua thuhilhnate zawhlah ding hilo thamlo in, pilna leh picin khantoh zawkna ding hizaw gige ahih lam theih huai mahmah hi.
Tua ahih manin tungtuan diakna dingin, HILHDING DEIHNA lungsim nuntakpihloh phamawh hi. Tua ih nuntakpih khitciang bekin tuahloh a phamawh thuhilhna-ahi, haksat buainate’ tungah gualzawhna la in ih tungtuang diak zo pan bek ding hi.
3. Vaipuaklakna: Picinna Kalmasa
Khat veivei vaipuaklakna cih tawh kisai-in, a ki ngaihsun khial thei khat pen, sep dingin hong kisawl thukhat peuh sep zawhna pen vaipuaklakna kisa kha thei hi. A taktak in ‘vaipuakla’ cih kammal pen ‘Vaipuaksawl’ cih kammal tawh kilehbulh lian hi. ‘sawl’ hilo in ‘la’ ahih mah bangin, hong kisawl ciang sepna lel pen vaipuaklakna hilo aa, hong kisawllo pi mah latawm aa septawmna pen vaipuaklakna ahi hi.
Cuba buaina tungtang ah U Thant in vaipuak la in, a hanciamna leh a daihsak zawh takpi na thu mikimin ih theihciat ahi hi. Tua hunlai-in, U Thant pen UN General Secretary a kipin leennailo in, kisinsakna (impermanent) hun sungah a omlaitak ahi hi.
October 24, 1962 ni-nitak in Council Meeting khat nei uh hi. Mun tuamtuam pan apai ta’ngmi tamlua mahmah ahih manin, tutna khempeuh a dim phitphet baanah, honpi khat tutna ngahlo in ding zihziah lai uh hi. Tua hunsung ah U Thant in, “UN pen lungkham huai mahmah dinmun ah ih omlaitak ahi hi. Hih buaina ih daihsak zawh kei leh UN bek hilo in, leitung milip khatciat in siatna a manawh khinta ih hi hi. UN Secretary kip ka hih nailoh hangin, mihing khat ka hihna tawh kong thumnop in ah: ih lungsim ki-ukzawhna leh daihna phuh nopna lungtang tawh khut kilen khawm dingin ke’n itna tawh kong zawn hi…” Ci-in, itna leh veina tawh amah mah in vaipuakla tawmin, kipia tawm hi. Tua a vaipuaklakna hangin a nunungna ah daihna-a phuhpih zawh takpina thu Ramese Nassif in U Thant In New York (A Portrait of third UN secretary-general) cih laibu sungah kim takin gelhin na pahtawi didek hi. Hithu mah U Thant a dingin a minthan pih pen thu khat leh a tungtuan pih pen thu khat hong suak hi.
EQUIP leh INJOY Stewardship Services phuankhia in, mite a makaihsiam na hangin a minthang vangvang John C. Maxwell in, “vaipuaklakna pen mikim in ih neihtheih a thupi penpen hihtheihna khat ahi hi. Kithawikhia in tua hihtheihna ih zatkhiat theih bekciang, ih nuntaakna sungah tungtuan zawkna khat hong kipan pan ding ahi hi.” Naci hi. Hi mahmah hi. Vaipuaklakna in theihna behlap in, tuahkhak sinna khangsak hi. Theihna leh tuahkhakna kibehlap lopi-in ki tungtuang zo ngeilo ding hi. Bang hang hiamcih leh mite a theihna uh leh a tuahkhak uh a na kibehlap den uh ahih manin, nang a’ a kibehlap kei peuhmah leh hong kipaisan lel ding himai hi.
Vaipuaklakna lungsim aneilo mikhat in ama mawhna nangawn, mite’ mawhna suaksak ta leuleu thei uh aa, vaipuaklakna lungsim anei mikhat in bel mawhna a kici khempeuh zawhna suaksak thei ta leuleu hi. Mawtaw Company a phuankhia cilpa Henry Ford in, “manager khat in anuai aa nasemte peuhmah mawhsak hetloh ding sangin a thupizaw bang mah omlo hi. Mawhsakna hangin lawhcinna omngeilo napi, lawhsapna omsak den zaw hi.” Kimawhsakna leh vaipuak laknoplohna in kitamkhapna leh nuaikiatna piangsak den ahih lam Ford in tel mahmah cihna ahi hi.
Stephen Covey in The 7 Habits of Highly Effective People cih a laibu gelhna sungah, lawhcinna dingin vaipuak lakzia ding tampi na gelh aa, tua sungah ahoih mahmah khat in “lawhcinna dingin a thupi mahmah vaipuaklakna khat pen, a kisam/a omlo mikhat pahtawina-ahi hi. A mah na pahtawina hangin, a omte/a kicingte tungpan muanna nangah lawh ding hi. Bang hang hiam cihleh khat tungah na bawl thu in 99% te huzaap zo ahi hi.” Na ci hi. Vaipuak lakna in siatna ding pan suahtakna piangsak thei-in, muhna theihna leh siamnate zongh khangto saksak pah hi.
Tua ahih manin, tungtuan ding leh lawhcin diak ding lungtup in a nei mikhat in vaipuak laknopna lungsim neihloh phamawh hi. Tua vaipuaklakna hangin, haksatna buaina leh gensiat cilphihna ki phukha thei ding aa, ahi zongin, tuate hang mah in, theihna, muhna leh siamnate khangto in picinna sungah hong lutpih ding hizaw hi. Tua-ahih manin, tungtuan diak nadingin lakloh aphamawh VAIPUAK LAKNA lungsim neihloh phamawh hi.
Thukhupna
Hihdiakna/kivakna khat peuhpeuh ih neih hangin tungtuanna kingah den zolo aa, ahi zongin theih beh nopna leh sin beh nopna lungsim ahi, kiniamkhiatna lungsim nei-in, sin behna leh katbehna sungah tuahkhak thute khempeuh thuhilhna-ahih lam phawk in, zawhnopna leh siamnopna tawh kipiakkhiatna/vaipuaklakna lungsim nuntakpih in mainawt aa, a kalsuan mikhat in, lawhcinna leh tungtuan zawkna ngahlo in omlo ding hi.
