Thupatna:
Tuni ciangciang, Kawlgam ah tansawm laivuanna pan mark ngahzah tawh kizui-in a kilakna tungtawnin, Singkung tawh kisai pilna-ahi, Botany pen mark gawm a tawm penpen pawlte in ngah den tawntung lai hi. Gamkhangto sate delh in a kihanciamna hong taksuah taktak lebel, mark ngahzah dungzui cih sangin, lunglut penpen cih leh, a kisam penpen leh sinloh aphamawh bang hiam, cih tawh hong pai ta ding ahi hi. Tua bangin, a phamawh leh lunglut tawh kizui-in Major Subject a kiteel theih hun hong tung taktak lebel Botany icih pen, sinloh aphamawh khat ahih lam kiphawk sansan ding ahih manin, a lunglut tawh a lunglut lo tawh, tansawm mark gawm tawm ngah tawh, tam ngah tawh in hanciamtak in delh ngeingei ding uh hi. Ahang tampi omte sung panin, a tom thei pen leh mikimin a kitel thei pen dingin nam thum ih enpak ding hi.
1. Botany leh Gilkial Dangtakna:
A nunung penpen World Economic Forum (WEF) - 2017 pan muhkhiatna zui-in, leitungah buaina lian penpen namsawm sungpan buaina 4#na pen ‘gilkial dangtakna buaina’ ahi hi. Hong tungding 2050 kum ciangin leitung mihing kigawm 9,000,000,000 (9 billion) sangin tawmzaw lo dingin kiciamteh hi. Tua hileh tulaitak sangin gilkial dangtakna-azah 60% peuhmah kithuak kha beh ding cihna ahi hi. Tulaitak aa-akithuak gilkial dangtakna tawh kisai, National Geographic panin a kantelna uhtawh kizui-in, mihing 800 million val (thabei) an lim tuilim nezolo in omin, nek le dawn ding limlim a neilo 2 billion bang a om baan ah, 1 billion bangin a kilekim nek le dawn gina nek zawhlohna hangin natna tuamtuam sungah ki om hi, ci-in mukhia uh hi.
Hih gilkial dangtakna buaina-a sukham zo ding bangmah dang omlo in, Botany pilna bulphuh khawina vulhna leh gah le teh ciinna namte bek mah a om ahi hi. Gentehna in: Plant Tissue Culture (PTC) ci-in, singteh themneng khat ahih keileh plant cell khat bekbek tung panin deih zahzah gah le teh a pian theihna dingin bawltheihna pilna pen botany sung bek ah om ahi hi. Tuamah bangin, a ngeina sangin gah leteh a zah sawmgiat dongin a tamzaw a kingah theihna dingin bawl theihna pilna khat ahi GMO ci-in mikimin a kiza ngei, Genetically Modified Organism zongh Botany sinlo khat in abawl theih ding lamet omlo hi. Hih PTC leh GMO pen leitungah nek le dawn haksat diakna gamte ah a kizangzang khinta hi aa, kawlgam zong hong ban diaidiai ta-ahi hi. Mipil tampi tak hih PTC leh GMO te tawh kisai na lunghumawh ngei uh aa, tudong ciang mah na lung himawhmawh lai uh hi. Bang hang hiamcih leh a ngeina hilo in, pilna zangin a kibawl tawm ahih manin, lampi khat teeiteei tawh mihingte’ cidamna susia hamtang ding hi, cih a lamen uh ahi hi.
Ahi zongin, PTC leh GMO tawh nasepna khat a kizawh simin, bang lauhuaina hong pia thei ding hiam cih sittelna kibawl tawntung aa, tuni ciangciang, kimu nailo hi. PTC leh GMO panin a piang gah le teh nekna dawnna hangin zongh mihingte’ tungah ‘hih lauhuaina leh natna piang hi’ cih theih lian ding om nailo hi. A taktakin ahih leh hih PTC leh GMO te himasa lo zawin, Chemical food cih theih ding ahi, singgah khat a min hunnailo pi aa, zatui pia in minsakna, amuat hun mahmah ding singgah khat a muat nailo dingin zatui tawh kepna etc. tepawl pen cidamna ding a lauhuai taktakte hizaw hi. Leitung gilkial dangtakna nusiat zawhna dingin a dang bangmah lametna omnawnlo in, hih PTC leh GMO bekmah mipilte in muan le suanin a nei uh ahi hi.
2. Botany leh Kiim le Paam Buaina:
Himun ah kiim le paam buaina icih ciangin, gamthu a gennuam ihi kei aa, khua hun leh Pasian bawlsa nate a ngeina bang leh a om ding bangin a omlohna a gennuam ihi hi. Kiim le paam pen daihna panin lam pialin buaina sungah mihingte hong lut pihpih khinta ahihna thu National Environmental Policy Act a kibawl hun 1950-1970 kiim pek panin a kimu khia khin ahi hi. Tu in ahih leh hih buaina pen WEF in buaina 1#na in ciamteh uh hi. Tua mah bangin, khua hun, nisa lua, acid guah, guahtui hun maanlo, Ozone layer kisiatna, huih niin etc. cih thute izakzak leh i theihtheih buainate hong suak in, hih buainate hangin mihingte’ tungah natna lamdang tuamtuam zongh a hunhun in piang zihzeh ahihna zongh milip in a kithei khin leh a kiphu khakha-ahi hi.
Hih buaina lian penpen in a kiciamteh kiim le paam buaina pen Botany sinin a it mimal a kibehlap dungzui-in a ki puahpha zo bek ding buaina nam khat ahi hi. Ngaihsut pak theih dingin, singkungte in photosynthesis ci-in, mihingte leh ganhingte a ding alauhuai huihniinte (CO2) zangh in, mihing/ganhingte’ a ding a kisam penpen huih siangtho (O2) hong khah khia kik hi. Singkung lampilna neite in a kattelna uh ah, gammang tulak hectare khat in kumkhat in (CO2) 65 tonnes bangh zangh tum thei-in, (O2) 3.5 pan 5 tonnes kikaal bangh khahkhia thei hi. Ahi zongin gammang tulak bei semsem thamlo in, mihingte’ bawl setzung tuamtuam, na tuamtuam leh nasepna tuamtuamte’ hangin kumkhat in (CO2) huih sungah a tawmpen 1.8 ppm bangh kikhah khia den aa, mihingte leh ganhingte in idiik suk idiiktoh leh sepna bawlna leh a ngeina tuamtuam pan apiang combustion tuamtuamte hangin second khat in (O2) a tawm penpen 10,000 tonnes kizang tum den hi.
Hih dungzui-in huih (atmosphere) sunga singkungte’ khahkhiat huih siangtho (O2) pen tuzawh kum 3000 ciang kizang tum (bei) ta ding cihna-ahi hi (Photosynthesis: Hall, D. O and K.K.Rao, 1994). Ahi zongin, a kikim citciat tissue nih (zatkhiatna tissue leh hawmkhiatna tissue) a kituat takciangin, singkung tissue khat (plant tissue) in (O2) a hawmkhiat zawhna tha pen a kikimpih zatkhiatna tissue (respiration tissue) khat tungah a zah 30 lianzaw hi (Advances in Environmental Sciences. 1st Edition: Dr. S.N. Pandey et all., 2012). Tua-ahih manin, singkung it in, suanbeh, keem khoi-in, gammang tulak mun tampi ah a om theih ding hanciam lehang, kiim le paam hong nosuak in, huih hong siangtho dinga, khua hun hong maan kikin, kiim le paam daihna pan lungsim pumpi nopna lamah hong manawh to kik thei pan ding ahi hi.
3. Botany leh Cidamna:
A nunung penpen (2017) World Health Organization (WHO) reports sungah abeisa kum 50 sung etkikna-a kibawlna tungtawnin natna tumtuamte a kibehlapna tawh kisai-in, 32% khanlam manawh aa, lungsim vangik hangin a nuntakna akisusia mimal 60% kibehlap hi ci-in gelh uh aa, hong tung ding 2020 kumciang ahih leh lunggimna tawh kisai natna pen leitung ah a kibuaipih penpen leh natna tam penpen pan anihna (2#na) hong suak ding hi ci-in report pia uh hi. Pumpi cidamna pen a kisam penpen ahih mah bangin, pumpi cidamna leh lungsim cidamna zong khenkhap ding haksa mahmah hi. Lungsim cidamna in pumpi cidamsak dinga, pumpi cidam mikhat zongh a lungsim cidam ding hizel kawikawi hi. Hithu hang mah in, lunggimna manggilh theihna dingin zatui tuamtuam kizangin a tawpna ah a sih lawh mi tampi takmah ana om khin ahi.
hi. Hih mihingte a dingin a kisam penpen ahi pumpi cidamna leh lungsim cidamna ngah theihna dingin a kizangh zatui zaha khempeuh ii 90% pen singkung lopate tung pan a kingah hizen hi. Tua sung panin Folk Plant Medicine ahih keileh Eastern Medicine a kici, (Holistic Approach ci-in mei, sing, sik, tui hite bulphuh kibawlna) chemical leh advanced research kullo aa (gentehna: sakolkhekhap ne lehang mit thahat) tangtawng ngeina zui aa-a kizang pah singkung lopa tung pan a kingah cidam theihna pen leitung milip 85% bangin tuni dong kizang lai aa, (Medicine Hunter. Chris Kilham et all., 2018) tua mah bangin leitung milip ii 15% in a kizang Western Medicine (Scientific Approach ci-in natna leh pumpi bulpulphuh kibawlna) zongh singkung lopate mah panin a kingah zatui zahate mah a kizangh ahi hi. Eastern Medicine theihna dingin Botany tappah kahtelna-a kisapluat kholloh hangin, Western Medicine tawh kisai-in, zatui/zaha thak khat muhkhiat zawhna dingin, Botany pilna kisam mahmah leuleu hi.
Hi bangin pumpi cidamna dingin a kizang zatui zahate bawlkhat theihna dingin Botany pilna-a kisap mah bangin, lungsim cidamna dingin zongh, Botany pilna tawh a kibawl singkung lopate’ hoihna tuamtuamte sum tampi tawh mite in ana lei ngekngek uh ahi hi. I deihcia lian pha in a khang nawnlo ding leh ideih lim le mel apua dingin a kibawl singkung (Bonsai) tuamtuamte pen inn sungah ahi aa, huang sungah ahi zongin, kicing, kikoih in lungnopna leh huih siangtho ngahna dingin kizang kawikawi khinta hi. Tua mah bangin, a lim leh a mel a etlawm dingin deih bangin a kigawmtuah (DNA alteration) paak, singkung, lopate zongh mihingte’ lungnopna ding leh pakhuan tuamtuamte ah color tuamtuam tawh a etlawm sak dingin ki suanin kiposak dimdiam kawikawita hi. DNA alteration mah bulphuh in a kibawl hun sim hun sim in a-a pak den dingin a ki buptuah singkung tuamtuamte zong mikim in a ki lei zolo Botany pilna mah tawh a kibawl hoihnate ahi hi. Tua thamlo in, plant propagation ci-in, singkung khat pan singkung dang khat piangsak tawmin, ahih keileh, lo pa khat pen singkung khatin bawlin, pak khat peuhpeuh pen a dang a kibatpihloh khat tawh gawmtuahin a tum dang diak dingin bawlin, lungsim thak ngahna ding, lungnopna ding, ahih keileh gah le teh lamdang diak nekkhak dawnkhak theihna ding, lunggulhna hi-in, sum tampi mah tawh mi tampitak mah in lei-in na ciing kawikawi uh hi.
Thukhupna:
Zomi Siamsin Kipawlna panin Siamsin Silver Jubilee Magazine sunga Major Subject tawh kisai section a ding, Botany thupina gelh dingin hong nget uh ciangin lungdamtakin ka hong gelh hi aa, Botany ahilo Subject dangte zong amau munciat ah thupi-in, theih huai, sin huai leh theih kul, sin kul vive mah ahi hi. Himun ah konggelh thuthumte pen, a tom thei pen ding leh Botany a sinkha hetlote in zong a ciamkha thei dingin ngaihsutna tawh konggelh hi aa, a huampi taktak mah hi-in, a sep abawl zia leh a sungthu kihello hi. Pilna khat peuhpeuh pen amau mun ciat ah tangzaiin, thuk aa, thupi ciat ahih manin, tua subject (pilna) thupi zaw, tua subject thupilo zaw cih bangin khen theih ding omlo hi.
0 coment�rios:
Post a Comment