THUMAANNA-THUKHUN PAWLKHAT

‘Thumaanin a gamta mite lungmuangin om ding uh a,  a zuautat mite ahihleh puk ding uh hi.’ 

King Solomon 

• Abraham Lincoln in, ‘thumaanna in hong suaktasak in, cihtheihna leh nopsakna hong pia ding …’ cih kammal laidal khat tawh gelh in a lukhu sungah pua tawntung. 
• Denmark kumpinu Caroline Matilda, thongkia in a omlaitak, thongkong khak tungah laigelh in, “Aw… ka Topa-aw, midangte minthanna na piak laitak, kei thumaanna hong pia aw…”  
• Martin Luther King Jr. thongsungah bawlsiatna thuakin a dah mahmah laitak hopihna ‘aw’ khat zavat in ‘Luther… thumaanna-ah dingkip in… nang tawh ka omkhawn den hi…’  Luther in a Dairy bu sungah gelhin, nuntaakpih ding hanciam pah. 
• Erich Kessinger (Policeman) in, a maiphiatna inndei tungah ‘Tuni thumaanin gamtat ding hanciam ning’cih laimal gelh in, zingsang a nasep kuankhiatma ta in sim den. 

Nang ee…thumaanin gamtat ding vei bangzah hanciamin, na kisin ngei khin? Tua thumaanna hangin ee, bangzah vei lawhcinna ngahin, bangzah vei bawlsiatna na thuakkha ngei khin? Thumaanna leh cihtakna etsakna-ahi Phualva tawh a kiciamteh Zosuan khat na hihna hangin ee, thumaanna na kisialhpih ngam na?  Nisim nuntakna sungah a thupi p penpen khat ahi thumaanna nuntakpih theihna dingin leitung thukhun tuamtuamte sungah a kigelhlo thumaana-thukhun pawlkhat na om hi.

Thukhun (1): Ei Le Ei Hikisa Photphot Ding: 
Ei le ei hikisa theilo in, kihawm thawh niloh na pen thumaanna pan pialkhiat baih penpen na khat hi citciat hi. Ei leh ei ki zumpih ngamlo, ihihna khat peupeuh hoih kisa theilo, eimau hihna ciangciang mah tawh na lianpi a kisem thei ahih lam mangngilh kha in, mipil, mi melhoih aa kipan, mi cithei khat peupeuh eng-gawp kha in, a mau’ hihdan peuh guksak nuam in ki peisuk kipeito kha mawkmawk thei hihang.

Tanglai-in Boston khuapi ah phim peuh, setkhau peuh a kipan van nengneng zuak in, a kileh kawikawi den khat om ngei hi. Tua mizawng pa Dr. Thomas Savage in a muh ciang, hehpih lua ahih manin, a nuntaakzia dong niloh hi. Hi mizawngpa, a gentheih mahmah hangin, a mah le amah hikisa mahmah lel in lungkim mahmah ahih lam, Dr. Savage in a theih ciang, thupi a sak mahmahna thu gelh kik ngei hi. Hi mizawngpa in, ‘a zi mi thumaan mahmah khat ahihna, a ma sum muh sunsun in a nek khopkhop uh sikzo lel a hihna, thumaanlo in gamta ngeilo a hihna le a tate mite tawh a kibangin pilsinsak zo veve ahihna’ hithu teng hangin, a lungkim mahmah lel ahihna thu gen mawk hi. 

Ei le ei i lungkim theih ciangin, thumaan ding hahtang pi-in hanciam kullo in ki nuntakpih zo ding ahi hi. Tua mah bangin, ei le ei i lungkim theihloh ciangin, thumaanna tawh a kigamla siatna le gamtatnate in hong huzap pah hi. I hihna ciangciang tawh I tup thu khat peuhpeuh a taksuah sak zo theite ihi hi.

Thukhun (2): Maipha Ngahnuam Lua Lawmlawm Lo Ding:  
Cornelius Vanderbilt in “mi lawhcing khat ka suahtheihna pen, midangte kihta khuankhuan lo in, a uanglua in maipha ka ngah nop luat lohna hang ahi hi.” Ci-in gen-ngei hi. Hi mipa mihau in a minthan ma, a kithuahpihpih a lawmte ahi Charles Morgan leh Cornelius Garrison te mihaupi vive hikhinta uh aa, a maute’ sawltakin a va ki-ap ngei ahi hi. Sawltak dangte maipha ngah ding leh a pute’ lungkim ding lung-gulh lua kisa zuau a khemnuam tawh, a mah a kipahtaak ding a ut manin, a kianga-a naseppih khat peuh a gensia pheiphei tawh, kituhteh zelzul in a omlaitak Vanderbilt ahih leh om khinkhian ahih manin a naseppih khempeuh in hawmthawh in, gensia niloh uh ahih manin, mai zumin Cornelius paikhia vingveng hi. Cihna ding mel theilo pi mah a mah leh a mah sumbawl dingin a kipatkhiat giap leh mihau khat suakzo veve hi. 

Khatvei BHP (Metal le Mining) Company ah Director a sem Paul Billton kiangah nasep siaute’ sungpan, kipuahphat ding a kisam, a kikhial mun penpen bang thu om hiam? Ci-in thukante in va dongh uh hi. Hih Director pa pen a minthang mahmah khat hi-in, a ma kiangah nasep asiau mi 60,000 valbangh thu a dotna tungtawnin ‘Nasep Ngah Theihna Ding Lampi Nam (6)’ cih laibu zongh a hawmkhia ngei khat ahi hi. Hih mi minthang pa in: - “Nasep siau in hong paite in a naak khialh mahmah uh thu khat om: tua pen, a taktak thute gen ngamlo zaw in, nasep ngahloh khak ding lau luat manin, thu a donghte’ hoihsak theihtheih ding ngaihsun in, a taktak ahilo phuahtawm bekbek a gen tam mahmah mawk hi. Midangte’ lungkimna tungtawn aa, maipha ngah ding lunggulhna tawh zuau pipi a gen liang te, kua’n nasep pia nuam mawk ding.” Maipha ngah nop luatna leh pahtak ding utluatna sangin thumaanna khahsuah baih zawkna ding thudang tam nawnlo hi. 

Thukhun (3): Hong Kitelkhialh Ding Laulua Lo Ding:  
Geoffrey Bull in a mission sepna mun Tibet gamte’ pianthak ding a nawngkaaisak penpen thukhat in, ‘U le nau sung kitelkhialh ding lauluatna thu.’ Na ci hi. Hi gam pen Communist te’ upzia leh Buddhist te’ upna in a huzaapcip hi-in, Buddhist makaipi Dalai Lama bangh pen Pasian zah in a ngaihsut uh ahi hi. Themcik zongh hehsak ngamlo uh aa, a ma cih bangh bangin a gamta khiankhian uh ahi hi. Piangthak khatpeuh omin hileh, tua piangthak khat hangin a makaipa uh ahi aa, a innkuansung uah ahi zongin, kitelkhialhna-a omding a launa hangun, a piangthak ding zah piangthak theilo ahih na thu Geoffrey a genna ahi hi. 

I lawm ih gual khat leh i zahtaak mikhat peuh tawh kitelkhialh ding i laumanin, sepding a kisam khat peuh kisem ngamlo thei-in, seploh ding pikhat zongh lah kisem kha buatbuat thei hi. Mikhat peuh tawh kitelkhialh khak ding launa sangin, thumaan thutak palsat khak ding a lauhuai zaw tham ahih lam ki phawkkhalo thei hi. 

Abraham Lincoln in kumpi ngah ding cih thu a kigen ngeingai ciang, Kentucky pan a tanaute khat in sik-khau satin hibangin gen hi. “Lincoln… kumpi ngah ding ci-in hong za ing. Ka lungdam mahmah. A zenzen in kumpi na ngah takpi aleh hualai aa, na lawm nihte mangngilh kha hetkei o. Minister ciang bang peuh mah ngahsak hamtang thei lecin kilawm mahmah ding hi ei!”  Lincoln in, “Nong thugen hoih mahmah hi. Ahi zongin, kei pen, kuamah tawh kithuhkik ding lamen in na ka sem ngeikei hi. Tua mah bangin, mikhat peuh in, hong huhna hangin zongh a maute’ tungah kisuangtaak in, hong telkhialh ding uh a lau ding zongh ka hikei aa, kuama hong ukna sungah omlo in, thumaan thutak sung bek ah om ding ka ngaihsunzaw hi. Tua hi-in, tua ka lawmte (2)te in zongh, Minister sep theihna ding hihna kicing a neih naak vua leh a ngah ding uh hilel aa, tua ahih keileh ka cihtheihna ding om tuanlo ding hi.” Tuni dong ciang a khekzo ding a omlo dawnna namte ahi hi. 

Thumaanna hangin hong kitelkhialh khak ding lunghimawh khakna bekbek pen thumaanna pan kalkhat paikhialhna hita hi.

Thukhun (4): Lunggulhna Uangsak Lualo Ding: 
The New York Times thukizaakna-a neipa George Jones kiangah Tweed Ring Companyte in hi bangin huhna ngenngei uh hi. “bangbang hi-in, hithu ah nong huh keeikaai zawh ding a lamen ka hi uh hi. A hoih pen dingin nong sepsak loh aphamawh hi ungh. Hiah sum $100, 00, 00 kong keng thei uh hi. A vacih vua leh Jones in: “Hih nasepna pen sumlut ding lunggulhna ciang bek hilo in, thumaan thutak khelkhiatna ahi hi.” Tweed Ring Company in, thumaanlo in sum a zeekna hangun, a thusim uh a kitheih khak ding lau in, Jones kiangah a va zuau pih ding huhna-angetna uh a lawhcinglo uh suak hi. 

1999 kumin Sun Valley ah a kibawl sumbawl makai mithang teng kimuhkhopna-ah Warren Buffet in hi bangin thu gen hi. “Deih luatna leh lunggulh luatna in, sep loh ding pi hong semsak thei hi. Minthan nop luatna in, tualniamna hongtun thei hi. Hauhbaih nop luatna pen muipeei manlang lua bang aa; a hiciang khat tawh lung kimthei-in, ngak hithiat theihna pen sumkuang engine tawh kibangh hi.”

Lunggulhna-a uangluat ciangin thumaanna in mun ngah thei nawnlo hi. Lawhcinna dingin thumanna letkip a kulna nuai ah lunggulh luatna khiap den ding kisam hi.

Thukhun (5): Thumaanna In Gualzo Den Cih Mangngilh Lo Ding:  
Prof. Kam Za Mung in “thumaanna tawh kalsuanin, Pasian’ deihna bangin nuntaak ding a hanciam mikhat, a daupai theilo leh a lawhcing theilo tawh a kibang phial zongin, anunung na-ah thuhoih leh thupha mah tawh ki tuntuah veve hi,” ci hi. Khatveivei ciang, thumaanlote peuh daupai zaw in, thumaan tentante peuh daupai theilo zaw uh ci-in, kingaihsun kha thei hi. Ahi dingtawh kibangh napi, na hisuak hetlo hi. Epicurus in: “Thumaan thutak a nuntaakpih lo mi khat in cik mah hunin lungnopna kidapphah lawhcinna ngah ngeilo ding hi.”

Hau mahmah in a minthang mahmah ngei, J. Cooke, kum (25) a phaklaitak, a daupaina khempeuh in taaisan in sumh dipdeep mawk hi. Lungkia lo in, a kipat kik zelzel leh, khatvei ciang hong hau mahmah kik zo miau hi. Tua bangin a hauh kik ciang, a sumbatna mun 3000 val ah leeibaa loh in pai ngekngek hi. Hi bangin a hauh kik theihna mikhempeuh in theinuam in, lamdangsa ciat uh hi. Ni khat, sumbawl’ a lunglut mahmah tangval khat in, teldot ngiingei hi. Mihau khat suah theihna ding leh, supna baaina panin lawhcin kik theihna dingin, bangci kalsuan ding ihi hiam? a vat cih leh J. Cooke in; “hih na theihnop thu pen kei a dingin lamdang lo thukhat ahi hi. Bang hang hiamcih leh, ka nu leh ka pa’ tungpan ka ngah zongsatna hoih khat hang hilel hi. Tua zongsatna pen thumaanna hicitciat se hi. Mihingte in i sungtawng ah i theih baanloh hihtheihna khat ciat kinei aa, tua hihtheihna leh thumaanna gawmtuah in hi peuh lehang, hunkhatciang a ki lawhcing cih ding hilel hi,” ci-in “ei America gamsung ah hih bangdan zongsatna neileng mi lawhcing a suakziau ding kitam mahmah hi. Thumaanna tawh nungta in ‘na’ khat limlim sep ding a thupi himai.” cih san hi.

Louis XIV in Colbert kiangah, “Frence gamzah in alian leh a minthang-gam pawlkhatte ki ukzo napi-in, bang hangin Holland zah a-aneu gam pawlkhatte leuleu ki lazo hiaulo thei ahi tam?” a vacih leh Colbert in “gamkhat ii a thahatna leh a muanhuaina pen galkap tam neihna leh galvantam neihna himasalo in, thumaanna nuai ah kilungtuahna leh cihtaknate hang hizaw.”  Thumaanna thukhunnuai ah minuamsa gam, minam le mimal a suak dingin lunggulhna lianpi anei ihi hi.